Pluijm aacha usia mzito Singida

Share This:

Whatsapp Whatsapp Share it Tweet

Habari za kuaminika ambazo Mwanaspoti inazo ni kwamba Kocha Mkuu wa Singida United, Hans Plujim anakwenda Azam FC lakini kabla ya kuachana na timu hiyo amewapa ujumbe mzito.

Pluijm aliyewahi kushinda mataji manne na Yanga ikiwemo mawili ya Ligi Kuu tena mfululizo, ameiwezesha Singida kutinga fainali ya Kombe la FA pamoja na kumaliza ndani ya tano bora Ligi Kuu Bara msimu huu, hivyo kocha mwenye mafanikio zaidi nchini kwa sasa.

Mmoja wa viongozi wa Singida ameliambia Mwanaspoti, kuna dalili zote kuwa kocha huyo anaondoka lakini amewapa maelekezo ya kufanya.

"Uwezekano wa kuwa na Pluijm msimu ujao ni mdogo sana lakini ametuambia kama tukitaka kufanya usajili lazima tuanze na mshambuliaji wa maana mwenye uwezo wa kufunga kwani katika kikosi cha msimu huu safu ya ushambuliaji si kali," alisema.

"Sehemu nyingine ni winga mwenye uwezo wa kucheza kushoto na kulia na kiungo mkabaji kwani Mudathir Yahya naye anaweza asiwepo hapa msimu ujao," alisema Kiongozi huyo.

Meneja wa Singida, Ibrahim Mohammed alisema hata kama Pluijm amewaambia viongozi ni sehemu gani ya kuongeza nguvu ya kufanya usajili wa msimu ujao ambao wana nafasi kubwa ya kushiriki mashindano ya kimataifa.