Tambo Za Simba Queens Kuelekea Mechi Yake ..

Katibu mkuu wa klabu ya soka ya Simba Queens Asha Kigundula amewaomba wapenzi na mashabiki wa wekundu wa msimbazi kujitokeza kwa wingi na kuishangilia timu yao itakapokutana na Kigoma Sisterz katika mchezo wa ufunguzi wa hatua ya nane bora wa michuano ya ligi kuu wanawake.

Kigundula amesema kikosi chao kimekuwa katika maandalizi ya muda mrefu sasa na wanaamini kuwa wataibuka na alama tatu katika mchezo huo ambao utafanyika katika uwanja waLake Tanganyika mjini Kigoma.

“Maandalizi ni mazuri, tunacheza na Kigoma ni moja kati ya timu nzuri, tunajua tutakutana na upinzani mkubwa na wenyeji wetu hawa ambao waliongoza katika kundi lao walikuwa nafasi ya kwanza, ni moja kati ya timu ambazo mpaka leo hii haijafungwa hata mechi moja lakini tunajua sisi ndio tutakaoibuka na ushindi,” Kigundula amesema.

Kadhalika Kigundula amewaomba wale wote ambao walikuwa wakitamani kuiona Simba ikitua mkoani Kigoma basi wajitokeze kuwaona wakina dada hao ambao amesema wanalengo la kutwaa ubingwa huo msimu huu.

“Ninawaomba wakazi wa hapa Kigoma ambao ni wapenzi wa Simba wajitokeze kwa wingi kwenye uwanja wa Lake Tanganyika kutuunga mkono ili wachezaji wetu wajione kama wapo jijini Dar, lakini pia wanasimba wote nchini wajue kuwa wanatimu yao wasiitupe waje kuiunga mkono,” amesema.

Matokeo mengine.

FT: JKT Queens 4-0 Alliance Queens

FT: Baobab Queens 3-2 Mlandizi Queens

FT: Panama Girls 1-1 Evergreean Queens.